واش عمرك سولتي راسك علاش حنا فقراء ؟

غادي تقولي حيت واليدينا فقراء وورثونا الفقر .

بطبيعة الحال ، وكثر من هادشي ورثونا طريقة التفكير لي غادي تخلينا فقراء .

شحال من واحد واليديه مستاعدين يبيعوا لي عندهوم باش يعطيو رشوة و ولدهوم يدخل للبوليس ، أو باش يحرگ على برا ، ولكن نادرا فين يقدروا يديروا هاد الخطوة باش ولدهوم يدير شي مشروع ، حيت بالنسبة ليهوم المشروع ماشي حاجة مضمونة.

أنا فأول مشروع ليا عانيت باش نقنع مالين دار ، وعند البداية وفأول عام خدمت و خدمت معايا خوتي بجوج ، وخا طحت ونضت وطحت ونضت ، ولكن مابقاش عندي داك الخوف ديال الخسارة .

الخوف لي ترباو فيه واليدينا ، هو لي ورثناه عليهوم ، حتى الطريقة ديال التفكير كتلقاها مبنية على الخوف من المستقبل ، داكشي علاش كيخبيو الدرهم لدواير الزمان ، فالوقت لي ناس اخرين كيفكرو يولدو من درهم درهم خوه ، ومن جوج دراهم ربعة ، وهكدا كتكون الثروة ، حيت الإذخار مكيحققش ثروة ، الإستثمار هو الثروة .

شحال تقدر دوز ب 1000 درهم علما أنك كتصرف من 70 درهم حتى ل 100 درهم فالنهار ، غادي دير عملية حسابية وتقولي من 10 أيام ل 14 يوم ، غادي نقولك لا ، تقدر تصرف منها حياتك كاملة و تقدر گاع دير منها دار والسيارة ، جاتك عجب ؟

مول غلالة مثلا شحال عندو فراسمال ، واش عارف شحال كيصور فالنهار ! 

ومول غلالة هو نمودج بسيط من الإستثمار ، حيت هو براسوا يقدر يطور من راسوا كون ما ورتش  داك التفكير الكلاسيكي ديال العمل من أجل المال .

بزاف ديال الناس فالسويقة بداو من فراشة ثم كراو محل ، ومن بعد ما حققوا راسمال متواضع ، ما بقاوش كيخدموا على ود لفلوس ، ولاو لفلوس كيخدموا عليهوم ، كيكريو محلات ويعمروهوم بالسلعة ويجيب لي يخدم ، وملي كيفتح عليه الله ابواب الرزق كتلقاه مقهوي حداك و الفلوس داخلة .

يقدر يكون الفقر مرحلة من حياتك ، ولكن تفكيرك هو لي كيخلي ديك المرحلة تكون طويلة حتى توصلها لولادك.

#عادل_اسلام