الا ركزتو فالخبز لي فالخنشة غادي تبان ليكوم واحد الخبزة تما مقطوعة من نص ..  هادي تقريبا شي سيمانة وانا كنلقا ديما خبزة مقطوعة من نص .. مول الخبز كيدوز بكري من حدا الحانوت وكيعلق هاد الخنشة وفاش كنحل انا الحانوت كنحسب الخبز وكنلقاه هوا هذاك ولكن خبزة مقطوعة من نص سولت مول الخبز وكاليا لا انا مكنخلي ليك حتا خبزة مقطوعة  .. هاد اللعيبة ضراتني فراسي اوااه سيمانة على قدها وخبزة ديما كنلقاها مقطوعة على جوج ! هذا لي كيقطعها علاش ميسرقش خبزة على قدها بما أنه مشافوش حتا واحد ولا يسرق خنشة كاملها ويزيد مع طريق ! مبغاتش تسرط ليا هاد اللعيبة .. ليوم فقت بكري قبل لوقيتة المعتادة غا باش نشوف شكون كيقطع ديك الخبزة .. مشيت حدا لحانوت وبعدت عليها شوية ولابس جلابة وضارب قبية ومكنبانش واش انا هذا وبقيت مراقب الوضع من بعيد .. داز مول الخوبز وحط الخنشة ودازت شي خمسة دقايق تقريبا وها واحد المسطي جاي هوا يقصد الخنشة ديريكت هوا يهز خبزة قسمها على جوج حط نص فخنشة ونص لاخر غادي معا طريق وكياكل فيه .. انا تصدمت فاش شفت شكون كيهز الخوبز تصدمت حتاش هاد المسطي شي أسبوع هادي ديما كيدوز من حدايا معا الحضاش تقريبا كيحط ليا عشرة دريال فوق كونطوار وكيمشي بلا مايدوي ومكنفهمش فيه والو .. تال دابا عادا عرفت أنه مسكين ديك عشرة دريال لي كيحط ليا غا كيخلص ليا بيها نص خبزة لي كيهز

منقول